Isë Mërnica u lind më 5 korrik 1952 në fshatin Kodërflamur (ish-Vesekovc).<br>

Isa ndihmoi organizimin e Ushtrisë Çlirimtare të Kosovës në Shalën e Bajgorës.<br>

Më 30.6.1998 në këtë trevë formohet brigada 141 “Mehë Uka” në ZOSH. Isa caktohet komandant kompanie në Batalionin e Dytë në Rashan, ku kjo kompani transferohet në Sumë. Në këtë kohë Isa kalon në Melenicë, Preten e Mejdan, që ishte një pikë strategjike me rëndësi e UÇK-së, ku armiku vazhdimisht tentonte të depërtojë.<br>

Në ofensivën e 15 shtatorit 1998, kur pushtuesi serb sulmon Shalën e Llapin, Isa bëri një rezistencë heroike, duke përdorur strategji, guxim e taktikë të dalluar.<br>

Në shkurt të vitit 1999, Isa caktohet komandant kompanie në Sumë. Në agun e 24 marsit 1999, nga armë të lehta e të rënda artilerike të ushtrisë armike serbe rrahet me zjarr e hekur. Në këtë luftë të ashpër e të pabarabartë, Isa dhe kompania e tij bëjnë rezistencë, duke filluar që nga ora 7 e deri në orën 12 të asaj dite, ku bandat serbe me artileri të rëndë futen nga sipër dhe nga ana e Tërllabuqit, me qëllim të pastrimit të terrenit, si dhe nga Krivareka, ku kishin depërtuar e ishin pozicionuar gjatë natës. Pas një beteje të ashpër, Isë Mërnica ra heroikisht. Pranë tij bie edhe bashkëluftëtari i tij, Nysret Zymeri, pikërisht te vendi i quajtur “Quka e Sumës”. Trupat e këtyre dëshmorëve janë zbuluar pas përfundimit të luftës në varrezat e Suhodollit në Mitrovicë.<br>

Dëshmori Isë Mërnica kishte pasur nofkën “Shpendi”.